2025年1月15日【#香港體育｜擔任「全運會香港賽區義工計劃」評審員】
- miayu3
- Oct 3
- 1 min read
四年一度嘅全運會係國家最高水準和規模最大嘅綜合運動會。2025年十五屆全運會將由粵港澳首次合辦，而香港有幸承辦當中8個競賽項目。要確保呢項大型活動喺香港順利舉行，非常需要一隊高效同充滿熱誠嘅義工隊伍支援，因此政府亦推出全運會香港賽區義工計劃 。
我經常都鼓勵青年人成為義工，除咗幫到社區上有需要嘅人，亦係學習新技能同開拓人際社交網絡嘅好機會。而我都好榮幸擔任今次義工計劃嘅評審員，為招募義工出一份力。參加義工招募嘅申請人嚟自唔同年齡層及背景，佢哋對服務社會都非常熱誠，我從佢哋喺面見時嘅分享和介紹中，充分感受大家希望親身參與國家盛事嘅興奮同期待。
我知道目前義工招募已收到超過3萬份申請，預計有超過1萬5千名義工將會喺全運會提供服務，另有約2千名青年義工參與，充分展現出「全運義工 全城起動」嘅精神。相信大家都樂見香港參與承辦今次全運會，激發市民對運動熱情，同時促進香港體育發展。
Comments